Standpunktkarakterar i fag, orden og åtferd

15. juni vil skulen offentleggjere standpunktkarakterar og halvårskarakterar i fag, orden og åtferd. Det er klagerett på standpunktkarakterar, og klagefristen er 10 dagar frå karakteren er gjort kjend. Både elevar og foreldre til elevar under 18 år kan klage på standpunktkarakterar. Før du klager, kan du be skulen om ei grunngjeving for standpunktkarakteren. Når du har motteke grunngjevinga, er klagefristen 10 dagar frå då du fekk grunngjevinga. For å sikre ei rask handsaming, tilrår me at dersom du ønskjer å klage, sender inn klaga så raskt som mogleg.

Korleis klager eg på standpunkt?

Du må klage skriftleg ved å fylle ut skjemaet og sende det til skulen v/rektor (leif.magne.lervik@mrfylke.no). Rektor hentar så inn uttale frå kontaktlærar (orden/åtferd) eller faglærar (fag) og skriv sin eigen uttale, før klaga sendast til den fylkeskommunale klagenemnda.

Klagenemnda vil vurdere om den som har sett karakteren din har følgt reglane for standpunktvurdering.

 For standpunktkarakterar i orden og åtferd inneber dette:

• At det er ordensreglementet til skulen som er grunnlaget for vurderinga
• At du er gjort kjend med ordensreglementet til skulen

For standpunktkarakterar i fag inneber dette:

• At kompetansen din er vurdert ut frå læreplanen i faget
• At du har fått høve til å vise kompetansen din på fleire og varierte måtar
• At standpunktvurderinga er ei samla vurdering av kompetansen din ved avslutninga av opplæringa
• At du er gjort kjend med kva som er lagt vekt på i fastsetjinga av standpunktkarakteren

Dersom du får medhald i klage på standpunktkarakter i fag, skal rektor setje ein ny karakter. Her vil rektor bestemme om du skal gå opp, gå ned eller bli ståande på same karakter. Det er ikkje klagerett på den endelege karakteren, men rektor skal gje deg ei grunngjeving for den endelege standpunktvurderinga.

Dersom du får medhald i klage på standpunkt i orden eller åtferd, er det klagenemnda som set endeleg karakter.

Kva om eg fekk karakteren 1 i standpunkt?

Dersom du får karakteren 1 i standpunkt, er faget ikkje stått. Då vil du ha rett til å ta ny prøve i faget (NUS) til hausten. Denne prøva har form som ein eksamen. Skulen vil kontakte deg med informasjon om dette. Karakteren frå NUS-prøva vil erstatte standpunktkarakteren. Det vil seie at dersom du får 2 eller betre, er faget stått. Elevar i årets Vg1 og Vg2/3I som får 1 til eksamen og/eller standpunkt vil få tilbod frå skulen om fagleg hjelp i førebuinga til den nye eksamenen i haust. Dette får du informasjon om ved skulestart 2023.